=========ياحالب البقرة======= ======نبيل الشضاوى============

ياحالب البقرة البقرة نشفانة
ودروعها مرضانة
من كتر خيرك بالدم مليانة
فطارها هم وعشاها مرار
حلبوها كتير من باشا لوزير
وعيالها شالو الهم
وكلة من خيرك ياعم
لا العليقة لقينها ولا الموتة طايلنها
خدو على الصبر وكلمة معلش
وانت طبعا صباحك ابيض زى المش
واله المش كمان مش طايلينة
تسلم ياغالى ويسلم تفكيرك
ماكان ناقصنا الا غليلك
تفشو فينا وشد حيلك احنا خدامينك
واخواتى حبايبى للقفا مسلطحين
راضين بالمر ماهم ولاية غلبانين
والدكر منهم لو فتح بقة ياكل الطين
نقول علية شيخ شيخة
ويخش جحر التعابين
تسلم ياغالى اديت منوم للكل
ورحمت الايام الحلوة انت فل الفل
والى مايرضى بالخوخ
يرضى بشراب المر
معلوم الى قبلك كان يويو واتلعب بية
والراجل الصح ثورنا ياعينى علية
قولنا علية حرامى هو وعيالة
جيت انت خربت البيت وقعت على بابة
تسلم ياغالى ولسة يامانشوف
والى مش عاجبة موجود ضرب الكفوف
معلش انا بخرف يادى الكسوف
عارف عارف ان لسانى طويل
بس معرفش اطبل لا لباشا ولا لوزير
كتبت كتير عن بلدى وبلدى بس
والى مش من دمى لم بالمى يحس
ام انت ياغالى اسم الله عليك
فاقد الاحساس والحس
يادى النيلة خرفت تانى
يظهر انى فى حب بلدى انانى
اسف اسف للتعبير
اصل مهما اقول مافيش تغير
ويمكن ربنا يهديك
وعهد عليا ادبحلك طيك
بس من ديوك معاليك
الى بيطبلو دايما ليك
لكن نصيحة واحد بيخرف
اوعى تقول دول نايمين
وما حد منهم هيعرف
دى مش نومة دى ترئيدة
وتحت الترئيدة بركان غضب
وحمم كتير عديدةاحذر احذر
غيرك ياما صبرنا علية
وفى لحظة جبنا فوقية تحتية
اوعى تفكر انك فى المكر لئيم
احنا عارفين كل حكاوى الكهين
والدور جى جى عليك
اوعى تتغر معاليك
احذر احذر ياحالب البقرة
البقرة نشفانة ومن خيرك
بدم الغل مليانة