#سياسة_درجة_تاسعة
#مسطول_وداير_ف_الحواري
وع المساطب والمجاري
وف الشواع والبيوت
عمال يدوَّر ع الغنيمة
وبالمحايلة وبالشتيمة
وبالمسايسة الليل يفوت
ما انا كنت زي ما قال كتابي
وماشي اعمى ما بين صحابي
وتحت جدران البيوت
عشت حاضن حضن خاوي
ف الحواري وع القهاوي
واللي بان مني السكوت
هيا كدبة ومش حقيقة
وكل ذنب وليه طريقة
وهيا بنت ومش بنوت
واسألوا الأسفلت عني
وقت ما ...كان سنّه سنّي
والبرودة اللي ف يناير
شاهدة إني مش هاموت
واتحادنا وانقسامنا
واللي حط الخوف ما بينا
خلي قوتنا ضعيفة
زي خيط العنكبوت
والكبير عمال بيسرق
من فتات غلبان بيعرق
واحنا زي اهبل بيغرق
جوّا بحر البنكنوت
#مصر_يا_مَّا_نفسي_اعرف_مين_أبويا
اللي رماكي ما بين أسود
نفسي اعرف إيه ديانتك
وللا أعرف ايه طبيعتك
ف المصاحف واللاهوت
نفسي اغمض عيني فجأة
واتخرص ساعة المفاجأة
لما افكر ان حالك
زي حال أرض الزيوت
بتروكيما ونفط سادة
مجري دم وقهوة سادة
هما دول أصل العبادة
تحت ضغطة من الريموت
دار نشر القلم للطباعة والنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة