وطن
إكتب حروف
كلمة وطن
إبعتها ف رسالة
لأى نمرة
م اللي ظاهرة
ف أسفل الشاشة
جايز سنينك
تعتقك
من قسوة
التكشير
تعشق بلدك ببساطة
تدخل السحب
الكبير
ويـّانا على
حبِة دفا
ممكن تشوف
كمان شبرين كرامة
تفوز بحَبة
إنسانية بغرابه
طيش المخُاطرة
ف نطة الأوتوبيس
مش بعيد
لما تعشق العيال
يجْروا ع الباب
يُحضنوك
يشموا فيك
قميص الحزن
ينسوا ريحة
الفرح
تطرح سنابل
اليأس
حزن للوطن
تشد عزمك
بكرة ف الطوابير
تستنا دورك
ف طابور العيش
ويا الخلق
الجعانة
لما تفرد جتتك
إكتب حروف
كلمة وطن
ابعتها ف رسالة
إحتمال وارد
يمكن يلعب معاك
الحظ لعبته
ابنك بنتك
يرجعوا م المدرسة
بدون امتهان
من غير عاهات
لا تليفونات بتبلَّغك
إن الأمل
قبل ما يبدأ رحلته
هناك مرمي قتيل
جثة يادوب
متفحمة
خدشت حياء
عرض الطريق
متنتورة منها
الصوابع والإيدين
اللي فاضل منه
تتعرف عليه
شنطة راجعة لوحدها
ع البيت
ف جيوبها
كراسة وقلم
حلم رَسَمْه طفل
م الأموات
بينعي للناس الوطن
بيشكي للسموات
خارج
بسمته
فارده جناحات
خارج من مدرسته
يرسم أحلام
بضحكته
ضحكت الأغصان
فجأة
بضربه غدر
من خسيس
أصله جبان
وسط المدافع
مات الولد
ماتت ضحكته
جسمه بقي
ف كل مكان
ذنب الولد
إنه كان يتمني
يعيش ف أمان
ذنب الولد
إنه كان يتمني
يعيش ف أمان
نسي إنه عايش
بين حيتان
الوطن أرضه
مغتصبة
ف كل مكان
إكتب حروف
كلمة وطن
ابعتها
ف رسالة
إبعتها
ف كل مكان
إبعتها ف
كل مكان
$#@$######
سندباد العامية
# عبدالحميد علي #
دار نشر القلم للطباعة والنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة