"بنت القمر"#أحمد__الجندي

أصوات ديابه ف ليل كئيب

غاب القمر علشان يزود نظرة الخوف المحيطه
بيزيد كمان رتم الإيقاع
مركب بدون ساري وعلم
ولا حتى دفه أو شراع
والمطره تنزل م السما على خد أصفى من الحليب
الكادر ناقص صوت لهيب الأفئده
وإزاي يبان ؟؟؟
الكون جبان ...
بنت القمر وأخت النجوم
بيتها السما وغناها بيشق الغيوم
ويوماتى تنزل عندنا
إزاي قدر هذا الزمن بغباؤه يكسر قلبها
إزاي قدر على حزنها
وإزاي يدوم ؟
انا كل ليله أطلعلها أو هي تنزل ... كل يوم
بقالي فتره بحاول أكتبلك .. وبفشل
وأرتجل .. وأمسح
والشاي . أنتيمي اللدود
بيلومني ويهزني
إزاي إيديا بترتعش كل إما أحاول أنزفك ... وأنزف معاكي بشوق
إزاي رفضت أفوق رغم أنه أحسنلك
وإزاي بكايا عليكي ديما بيوصلك
وإزاي وحيده بتبكي من غيري على غيابي
أنا .... إرهابي متطرف وواجب حضني .... ضميني
سبيني أتوب ف أحضانك عن العصيان وعن توهتى وسوء ظني
سبيني أغني عن طيبتك وإحساسك
نعومة خدك الدافي وبلسم ريقك الشافي
ونظرة عينك الصافية
وملمس حبك الكافي
الشمس بانت .. وبان معاها المينا والمرسى
هذا المطر مطلعش أصلا غير دموع
هاذي الصبيه الطيبه مش م الملايكه بطبعها ... كات م البشر
هاذي الحياه شئ مبتذل
هذا الولد ضيع حياته ف الغزل
وبدون خجل ... ضم الصبيه مابين إيديه
بصت حوريه من السما
وندهت عليه
طمن بحبك قلبها
وأغزل نهار يشبهلكم
أسكن بروحك نبضها وأحرس بقلبك حبكم
وإياك تغيب يوم عنها
هتوهو ليه من بعضكم