لحد امتى بقلم فهمي علي

و لحد امتى هيتقفل بابنا اللى كان مفتوح اوى
و يجنزروه بميت سلسلة ... و يدقو فيه سيخ ملتوى
و الدبابات دادبان عليه ... من يوم ما قال لا انتوى
بيجرجرونا للى كان ... و اللى عليه الشعب ثار
و بيطفو انوار الحياة ... بعد اما كان الليل نهار
منعو دموع الموجوعين قادوا ف حلم الخلق نار
يا موزعين حصص السكات على كل بيت من فين لفين
و مكممين صوت الولاد ... و محللين موت السجين
يا منفضين جوا الجيوب ... واخدين شمال واخدين يمين
احكولنا امتى هتشبعوا و ترجعوا صوت الهتاف ؟
و تسيبوا احلام تتولد ف عيون ولد لم مرة شاف ؟
و الدنيا تانى تبتسم ... بعد الضنا و سنين عجاف ؟
ف حكاية الميادين تاريخ بيقول يا هذا الشعب قوم
افتح بيبانك ... هدها ... و اشعل نيرانك ف النجوم
صحى اللى مات من تربته .. و اوهبله تانى حياة تدوم
افرد ايديك ادام عنيك و اوصل بها لابعد مدى
طبطب على كتف الجدع ... اللى انخدع فى المبتدى
و امسح فى عرق الشقيانين ... و اطحن برجليك العدا
بس انتبه ... اياك تقول دا فلان رسول جايب معاه نقطة وصول
او دا اللى جايب جنته و ف شنطتة حبة طبول
لملم خيوطك كلها و اصبر لها .. حتما ... تنول
مد الايدين جوا السنين و اخطف نهار يشبه هواك
نادى على اللى بيعشقك و مصدقك يصرخ معاك
انت اللى عارف علتك هات الدوا .. سلمت يداك
ابدر فى ارض الخوف امل .. هز الاجل و امسح دموع المجروحين
خضر ترابها و ابتدى ... تصحى قلوب المحتاجين
و انسى اللى نسيو فرضها .. يوم عرضها ما غرق فى طين
ربك معين
هيفيض عليك من رحمته و بنعمته يهديك سبيل
بس انت حاذر يا جدع لا تنخدع .. و ابقى الدليل
اصل الكلاب ما بيشبعوش ... و ما يعرفوش المستحيل
#فهمى_على