................. موال الحياة ............... بقلم / نصر فؤاد ...........................Nasr Fouad ‏13 مايو‏، الساعة ‏11:41 م‏

إضرب بإيدك ع الوتر وحرك كلام بين الضلوع.

واحكي لليالي حكاية حروفها تضوي الشموع.
وفجر عيون الزمن أنهار تملا للعالم دموع.
 وامشي مشوار الحياة خطاوي مالهاش رجوع.

إضرب بإيدك..

مين قال إن الحياة سهلة ومفهومة.
دي كل خطوة فيها قاسية ونمشيها.
ونفوسنا راضية بس روحنا مهذومة.
 وأسرار قلوبنا أيام القسوة تفشيها.

إحكي الحكاية..

بيِوْصِل وِدُه بين الناس وأحبابه
وفاتح قلبه لكل الناس واصحابه
ماكانش ظنه إن الدنيا تغدر به.
 ولا كان في باله إن الفرح يخلا به.

فَجّْر دموعك..

حِزِنْتْ وحُزني من ألمي مخاصمني
وسكوتي من صبري على حالي معاتبني
ولو جمَّعْت هموم الدنيا وعبِّتني.
 ماراح تِدَمِّع عيوني ولاقلبي هايتعبني.

عَدِ الخطاوي..

ياخطوة ماشية وية الخطوة بتندهها.
شدي العزايم وية أختك وصاحبيها.
الوحدة مرة والابواب حالفة لتفتحها.
 واوعي وسط الزحام مرة تفارقيها.

عيش حياتك..

يا عايشين وسط الألم والوحدة محوطاكم.
بلاش تشوفوا الدنيا سودة بعيونكم.
شوفوها بقلب شب بريء بيتمنى.
يعيش حياته سعيد ومتهني.
وبعد ما يمشي يسيب الحب في قلوبكم.
 تفتكروا دايماً إنه كان مراعيكم.

إضرب بإيدك ع الوتر وحرك كلام بين الضلوع.
واحكي لليالي حكاية حروفها تضوي الشموع.
وفجر عيون الزمن أنهار تملا العالم دموع.
 وامشي مشوار الحياة خطاوي مالهاش رجوع.

بقلم / نصر فؤاد