جمعة عبدالجواد ‏18 يوليو‏، الساعة ‏02:00 ص‏ ،،،،،،،،حاجة تجنّن ،،،،،،،،،،،،

حاجة تجنن حاجة تضايق
والواحد أصلا مش فايق
وعدو خد منّا مضيق
وكمان ساعده أغلى صديق
والواحد صدره بقي يضيق
وانا اصلا اصلا متضايق
حاجة تجنن حاجة تضايق
والواحد أصلا مش فايق
وسياسة كدا مش حسّاسة
مفيهاش لا حصافة ولاكياسة
خلّت ناسنا تعيش فى تعاسة
وبقينا طوائف وفرايق
حاجة تجنن حاجة تضايق
والواحد أصلا مش فايق
وتشوف أحولى الاقتصادية
أسماك ألبان فى الملوخية
بحلم بالفول والطعمية
مبقولشى ديوك ولاّ عتايق
حاجة تجنن حاجة تضايق
والواحد أصلا مش فايق
والحالة معانا ضاد جيم
وبنلهث خلف المليم
ودى حالة والله العظيم
بتزهّق جدا يا خلايق
حاجة تجنن حاجة تضايق
والواحد أصلا مش فايق
وتعالى وشوف الإرهاب
متطرف ضال ونصّاب
عضماية ومسكتها كلاب
وكان منّا وفينا فى السّابق
حاجة تجنن حاجة تضايق
والواحد أصلا مش فايق
بنشوف وبنسمع بجرايم
سرقة أطفال ويّا بهايم
وصاحبهم صاحى أو نايم
ساعات أغراب ولاّ شقايق
حاجة تجنن حاجة تضايق
والواحد أصلا مش فايق
والناس كلها صبحت شرسة
كعداء م بين فرخة وعرسة
عايشين بفضايح وبجرسة
علّقو إخواتهم فى مشانق
حاجة تجنن حاجة تضايق
والواحد أصلا مش فايق
عيشة تقصّر فى الاعمار
بتحاوطك دايما أخطار
حياتنا بقت عار وشنار
ومملّة ولو حتى دقايق
حاجة تجنن حاجة تضايق
والواحد أصلا مش فايق
جمعة عبدالجواد
٢٠١٧/٧/١٧