الصحرا عروسة
مربعة على عرش لقلوب
تاجها العز والنصر
معطرة بريحة الشرفا
لباسها الصدق ولوفا
ويدها مخضبا بحنة لجدود
سالفها ديما يفوح بالنفقة
قرنقل وورود
وفرجليها شربيل
توارثاتو من جيل لجيل
يخطوي على عتاب البيعة
طايع يلبي
كاشف وجهو ما يخبي
ملي نادى حسن المسيرة
حزمت حزامها مجدول حرير
وقالت : لبيك ياسيدي
وهاذي أنا وهاذي أرضي
دمكم دمي
وكلامكم يزيد فلعمر
وعهد الله نرضعو لولادي
ونعلمهم الطاعة
ونواجهو أهل لغدر
مغربية أنا وسرقو مني الهوية
أنا فبلادي كنت مسبية
وجا وقت نرفع الراس
جا وقت يعرفو الناس
الصحرا رجّعت الهوية
رجعت حرة مغربية
تعانق علام لبلاد
احمر مزين بلخضر
لون دمي ولون الحنة
نعشق بلادي وبها نتغنى
أنا الصحرا لمغربية
بلادي بلاد الصمود والتنمية
وسيدنا ولد لسياد
سيدي محمد السادس
رجعني جنة عالية
بنت شريفة محضية
راسي عالي مرفوع
ولخير مغطيني سبنية
وفرحتي اليوم كملت بلحباب
من طنجة لگويرة
حبابي واخوتي
يغطيو راسي ويحنّيو رجليا
ومن كل جهة
تجيني بشارة وهدية
أنا الصحرا لمغربية
أنا لعروسة بنت لبلاد
مرضية والمحضية
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة