اعرف طبع الدنيا دي إيه
واوعى تعاند --- وامشي عليه
ان ضحكتلك --- متغركشي
وان بكيتك --- ما تقول ليه
دنيا ما تصبر يوم على حال
ودوام حالها يا ابوبا محال
يوم بتهني --- ويوم بتبكي
لا أمان فيها ولا راحة بال
----------
ياما خدعنا جمال الدنيا
واتاري دا كله جمال كداب
زي عطاشى وشافوا المية
وبعد ما تعبوا لقوها سراب
كنا بنجري ونجري ونجري
والأيام سرقانا بتجري
واحنا بنجري --- مكناش ندري
اننا دوسنا فوق الأحباب
-----------
ياما الدنيا ضحكت لينا
وعيشنا معاها في أجمل عيد
والأفراح بحر بيسقينا
وكل ما نشرب منه يزيد
فاكرين إن دا هيدوم لينا
أتاريه وهم ولما صحينا
لقينا الدنيا بتلعب بينا
تدي بإيدها --- وتاخد بيد
أحمد محمود عوض سعيد
الرحامنة/فارسكور/دمياط
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة