ليتنا نفيق و نعرف ما يخطط لنا
مطلوب يا مصر
مطلوب يا مصر
لا تعيشى ولا تموتى
دايما عليله
لاتتعافى -- ولا تقوتى
تطحن رحاكى بالهموم عمرى
لاتفرحى بصوتى
ولا تتهنى بسكوتى
تتغل ايدك
وتتقيد خطاويكى
وف سجن عجزك
لاهتعدى ولا تفوتى
==========
تعيشى راكعه
ومكفيه على همك
وبايد ولادك
مفيش غيرهم
يسيل دمك
وتحاسبى مين
مدامها طعنتك منك
تجنى الشماته
من الاعداء على موتى
============
مطلوب يامصر
ما تبصيش على ناسك
ولا تفردى ايدك
ولا ترفعى راسك
علشان عنيده قوى
وعصيه لسقوطك
وشده حيلك قوى
وعفيه فى شروطك
لايهدى سرك ابد
والهم هيحوطك
ولا نيل هيصفى لكى
ولا تعزقى بفاسك
=============
مطلوب ولادك
تتوه بيهم خطاويهم
تغيب عقولهم
ويعصى اللى يهديهم
يموت فى بكره الامل
وفى كل احلامهم
وتكونى انتى السبب
صانعه مآ سيهم
يسقط ولاء الوطن
مع كل اقداسه
ولو وصلنا لكده
سقط الوطن بيهم
لا يحسوا بيكى فى جرح
ولا فرح بيشاركوا
ولو طلبتى المدد
ضنت اياديهم
============
مطلوب يامصر
تعيشى طافيه على الميه
لا تستقرى ولا تهدى
ولا تلاقي معدية
تعيشى خوف الغرق
وتصارعى امواجه
تنادى طوق النجا
تلقى الرياح جايه
لاتلاقى بر امان
ترسى على شطه
ولا فرصه للربان
يخدك على ايديه
==========
مطلوب عقولك
تهاجر بره مكسوره
وان عاشوا فيكى
لامنفيه لامحصوره
تتوه ملامحك
ولا تثبت ليكى صوره
وان حد شافك
ما يعرف مصر فين هيه
================
احمد محمود عوض سعيد
وكل عام ومصر وانتم والمسلمين بخير
الرحامنة/فارسكور/دمياط
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة