طب وانت مين؟
وامّا تتلاقى العيون
يالله بقى اللي يكون يكون
بحب فيكي ضحكتِك
و لحظةحايرة ف نظرتِك
مع احترامي لحضرتِك
انا قلبي أوسع من ده كون
و بتسألي و ده مين يكون
أنا اللي بكتب قصتِك
واقرا الكلام من بَصتِك
وارسم حكاوي ف خطوتِك
ف كل حركة و ف السكون
أنا اللي مليان بالظنون
بالشَك و الخوف و اليقين
كل الدمشاعر ناحيتِك
كل الخطاوي ف سكتِك
كل الدروب من ناصيتِك
يا قِبلة الشوق و الحنين
على نن عينك مفطومين
من يومها واحنا صُغيرين
نلعب ف حوش المدرسة
نرمي على عينيكي المِسا
و لمّا تبقي كويّسة
نروح ننام مطّمنين
نصحى على عيونِك شباب
ندُق ليكي ألف باب
طابور تمام ما فيش غياب
و حتى لو متغربين
وبتسألي طب وانت مين
أنا اللي مهما الكون يكون
أوسع من الشوف و العيون
وسع القلوب الطيبين
مشغول و شاغل حضرتِك .
شعر ..
حسام بخيت
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة