ولما بانام علي جنبي
باشوف صورتك بتضحكلي
وباستعجب علي شكلي
وانا عايم علي عومِك
ولما تقومي من نومِك
باشوف شكلِك شبه شكلي وانا نايم
وبابعتِلك صور من عقلي بتشاغلِك
صحيح شكلِك ماهوش هو
وقاسيه شويه من جوه
لكن قلبي اللي فتَّحلِك
وعقلي عام علي عومه
يقوم الصبح يندهلِك
ويبدا بالحنين يومه
صباح الخير يا حلوه
اكيد حلوه..
مادام القلب مرتاحلِك
ووقت الحزن بيبوحلِك
باسراره
ولما الشوق بيستعصي علي فهمك
بيشرحلِك
ولما تسوقي ف دلالك
بيسمحلِك
خدود الورد ف اوانه تفتَّحلِك
تصحِّي الحب من نومه
وتبعتلي وتبعتلِك
انا بَحِب دلوقتي
ياريت وقتِك بيسمحلِك .
حسام بخيت
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة