.jpg)
عشان شمس الهنا تغنى لجيل ورا جيل
عشان النجمة تتبسم فى خد الليل
عشان بلدى
عشان ولدى
ادوس الشوك وأتحدى طريق الويل
ح اجدف عمرى ما ح أوقف
لغاية مااوصل الضفة
دراعى الدافى مجدافى
يخللى الصعب يتخفى
ومهما الموج يغالبنى
مافيش تيار ح يغلبنى
ولا الأيام ح ترهبنى
بعون ألله
راح ابنى حياة
واخللى لنصرتى زفة واقول مواويل
عشان بلدى
عشان ولدى
ادوس الشوك وأتحدى طريق الويل عشان بلدى
على الشط البعيد يابا
حمامة بيضة بتهدى
لاصخر هنآك
ولااشواك
ولا فى غير أمل وردى
وأيام حلوة تتمخطر
تقول ا تعب كمان واسهر
تلاقى الحلم يتفسر
بعون ألله
راح ابنى حياة
واشيل الحمل فوق زندى وبالى طويل
عشان بلدى
عشان ولدى
ادوس الشوك وأتحدى طريق الويل
عشان بلدى
أحمد محمود الشاذلي
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة