أنا من همي هشكيلِك
وعن أحوالي هحكيلِك
ما أنا أصلي
شربت الصبر من نيلِك
وحرموني من الشكوى
وسمحولي أقول أشعار
واغنيلِك
وقالوا اياك في يوم تصرخ
ولا فكرك في يوم يسرح
وتيجي في يوم وتتلامض
تسمعنا كلام حامض
كلامهم حلقة في وداني
ولا بشكي وأقول ياني
لحد ما فاض وطفح الكيل
وصبري ضاع بكتر الشيل
ولا عدش بحيلي حيل
رميت نفسي بأحضانك
همست غتيني في ودانك
شربنا المر علشانك
عشان يعلا لفوق شانك
ولكن كلنا شايفين
صبرنا كتير ومر سنين
ويوم عن يوم يزيد الطين
ورحنا بلاش مع الفاسدين
وجاع الناس... بأم ملايين
زمان يا مصر يا بهية
قلوب الناس كانت هية
مكنش حدانا حرمية
بتسرق قُتنا بالملايين
يدوب يشحت عشان ياكل
ولما الهدمة تتاكل
يرقعها ولو بالدين
وياكل فول وطعمية
ويفرش أرضه طبلية
ويرضى بقسمته وأمين
أنا قلت اللي يرضيني
ويبري ذمتي وديني
وأيد المولى تحميني
من الفسدة وم التعابين
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة