وليه احتار ؟
وبدل الجنة اعيش في النار
وليه افضل عايش في عذاب ؟
واكون كداب
عشان اتفادى مواويلك
وطول ليلك
وتفسيرك وتاويلك لأحوالي
وتفتكري !! حاكون مالي ؟
ده انا بمشي في جنب الحيط
كده ف حالي
عشان الشك ليل ونهار
وغيرتك زايدة قايدة النار
على الفاضي وع المليان
وانا إنسان
بكمل عشوتي بنومي
بعيش اتدارى في هدومي
لا انا عايز اكون سلطان
وسي السيد في افلامه
ولاده وراه وقدامه
لكن عايز اكون إنسان
تحسي بيا بهمومي
تكوني فرحتي ف يومي
ما انا شقيان
ولكن فرحتي بيكي
وبولادي وحيطان بيتي
تخليني اهد الصخر بإيديَّه
واشق الضلمه بعينيَّه
لكن غيرتك
لكن غيرتك بتجرحني
تخليني اعيش محني
وانا راجل مانش ملطوط
ولا ف ضهري علامة لسوط
ولا عمري في يوم عطِّيت
ولا خطوة ف غلط خطِّيت
ولا ولِّفت على غيرك
وعمري ف يوم ما قلت ياريت
تعالي
تعالي حبيبتي
تعاليلي
تعالي ناحيتي وميلي
تعالي نورِّي عمري
وقيدي ليا قناديلي
ده انا راجلك
وبندهلك
تعالى ف حضنى على مهلك
بلاش الحيرة والغيرة
ده انا سندك
وانا اهلك
بلاش الحيرة والغيرة
ده انا سندك
وانا اهلك
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة