بكرة
راحت الأيام خلاص
باعت العمر ببلاش
واللي فاكرينه ماجاشي
جالنا واحنا ما دريناش
شفت بكرة راكب حصانه
واحنا مش عارفين مكانه
و اللي كان سابق أوانه
بص فينا و قال طناش
واللي كان ماسك ف ديله
كان له ف أمبارح دليله
لكل حي هواه و ميله
عبرة بس ماشفنهاش
بكرة ياللي شغلت بالنا
ياللي بتعلّق اّمالنا
روح بقى و سيبنا ف حالنا
تيجي ولّا ماتيجيناش
بكرة حِتة من النهاردة
صحصحوه وبلاش معاندة
سيبكوا من كلمة زمن ده
بكرة اّهو لا تقول ماجاش
ياللي مش عارفين تعيشوا
بين اللي مرمي ف حضن طيشه
واللي ملهي ف أكل عيشه
واللي ريّح ع المعاش
الزمن ده مافيهش بكرة
كل يوم بيقيد بفكرة
و الحياة قدامنا حاضرة
عِشنا ولّا ما عيشنهاش.
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة