الشاعر جمال زكى عينر
يذرف : ( دموع الفراق ) :
زي كل يوم
بصحِّيه م النوم
وبنده يا بابا
كفايه حبيبي نوم
ماردش عليَّا
ولا طلعش حِس
لا بص ف عينيَّا
ولا قال يا بِت بَس
قِلِقت وجريت
على اختي وناديت
وكنت بعيَّط
ونازلة صويت
وقلتلها ياختي
تعالي الحقيني
ده بابا حبيبي
مالوش اي صوت
جسِّينا في نبضُه
وقلِّبنا فيه
ونزلت في لحظة
دموع من عينيه
عرفنا ساعتها
ده آخر السباق
وإن الدموع دي
دموع الفراق
حبيبي يا بابا
رايح على فين
يبقى انت وماما
سايبنا لمين
ده بعدك يا بابا
مايبقى لنا بيت
ده كُنَّا بحِسَّك
وكان لينا صيت
يا ريتني يا بابا
مكانك يا ريت
واحشني زعيقك
واحشني الشخيط
واحشني يا بابا
وواحشني صوتك
واحشني كلامك
واحشني سكوتك
واحشني أما كنت
بتاخدني في حضنك
ماجاش يوم في بالي
اشوفك في موتك
سامحني يا بابا
زعلتك كتير
وكنت بتعفي
كان قلبك كبير
طول عمرك حنيِّن
ما بتشيلش ابداً
وحتى أما تزعل
كان سرك في بير
حبيبي يا ربي
يارب العباد
بحق ما حكمك
في عبدك أراد
وخدته بجوارك
وطال البعاد
توسع له قبره
بمد البصر
وِتِحسِن لقاؤه
في يوم المعاد
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة