مات الكلام ع اللسان
والقلب من جوه انفطر
والحزن عشش ع البيبان
واللحن معزوف ع الوتر
تلقاه حزين لوتسمعه
يحكى اعاجيب البشر
والروح فى ساعات الغروب
من خوفها بتحس الخطر
خايفه لا تغرب شمسها
من غير رجوع
والفرح يترك دربها
ويفوت دموع
حتى عصافير اليمام
غادرت وهجرت عشها
ولا عدت أسمع عزفها
وطائر الليل الجريح
من صرخته يبكى بنواح
مهموم بيعتصره الألم
يبكى على عمره اللى راح
واللى ضاع من غير تمن
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة