طيب ياما قالوا عليك طيب
شهم ومجدع ولا ليكش مثيل
والقلب بسرعه ليك بيميل
دايما راجل و وتملي أصيل
ولا مره سمعت أنك سلمت
ولا عمرك ياأبا يوم بتميل
واقف ع رجلك كده ع طول ع
صاحب صاحبك ولا يوم ب تكل
طيب ياما قالوا عليك طيب
وأنا كنت اسمع ولا مره أمل
فرحان بكلامهم قوي عنك
فرحان بشهامتك وبسيرتك
ياما قالو عليك انك طيب
دايما ب تسامح و قريب
عمرك ما بتيجي ع الغلبان
ولا مره تنام و حد جعان
ولا عمرك تقبل يوم تتهان
ولا مره تكون ف الحق جبان
طولك عمرك يابا كمان أنسان
واقف دايما ويا الغلبان
ع عشان راجل وابن أصول
ليك يابا مواقف مالها حلول
ولا عمرك تعرف أبدا يأس
ولا يعرف قلبك آي آفول
بتساعد الناس وبكل حماس
وتضحي عشانهم و بأخلاص
مين زيك ياأبا مين زيك
خليتني تملي رافع راسي
بين أهلي وقرايبي وناسي
ولا مره سمعت كلام آسي
علشان راجل طبعك راسي
ليك مبدأ واضح مش ناسي
ف حق العشره و الجيره
ب تحافظ ع الكل بغيره طول عمرك بتخاف ع أهلك
و مواقفك واضحه وشريفه
وضميرك صاحي مش نايم
و أيديك طاهره و وعفيفه
مين زيك ياأبا مين زيك
راجل مجدع سيرته نضيفه
وفي أي مكان ليك ألف حساب
ف الواجب أو ف التشريفه
بأتعلم ياأبا كتير منك
و بحاول أكون دايما زيك
ما أنا نفسي ياأبا أني أشبهلك
ف مواقفك أو حتي ف شكلك
وأنول لو شرف أني شبهك
وأتباهي ب قصصك وبسيرتك
ومواقفك ويا جميع ناسك
بتحب الناس لو مش أهلك
ف أخلاقك يابا أو طبعك
مع كل الناس توصف أصلك
علشان طول عمرك أبن أصول
ب تحب الخير وده من طبعك
سخى ف عطاءك وف ردك
عمرك ما حسبت لبكره حساب
دايما ب تسيبها علي الخلاق
ولا تعرف خوف ولا حتي عتاب
ولا تطلب شئ غير من ربك
بيقين وإيمان شئ يحسبلك
والدنيا ف كفك مش قلبك
و لا مره ب تاخد ع خاطرك
ولا فارقه معاك مين كان وياك
و لا فارقه معاك غير رضا ربك
وعشان كده عمري ما يوم شفتك
زعلان أو تضرب كف ع كفك
دايما فرحان والوجه بشوش
و الضحكه ف صوتك وف حسك
مين زيك مين مين يشبهلك
يا ابو قلب كبير تكفي جمايلك
والله بحبك و أدعيلك
وانا نفسي أزورك و أشوفك
وأفضفض وياك وأحكيلك
عن حالي يابا ف غيابك
ما أنا يابا كبرت خلاص بعدك
و أنا لسه ثابت علي عهدك
و مسيري هجيلك وأشوفك
واتدفي ب حضنك و ب حسك
وانا عارف و الله أني وحشتك
ما أنا حاسس يابا قوي بشوقك
و أنا يا أبا كبرت صحيح لكن
ما كبرتش الا كده ب حسك
وأنا هفضل عيل ف عيونك
محتاج لعطفك و حنانك
و تعلم فيا و توجه
و تخاف لو مره اني أتألم
فتشليني بقلبك و عيونك
قبل أما تشيلني برمش عنيك
وتنبه فيا ع مهلك ، خد بالك
يا أبني لتتألم النار حواليك
أو لمس الهوي حتي هدومك
أو دار و التف علي صباعك
وأهو بكره هاتكبر و تقدر
و هاتحكم بكره ب أحساسك
وها تعرف قيمتك وغلاوتك
وتشيل أولادك علي راسك
ويارب يبارك فيك يا أبني
و يعلي مقامك و مراتبك
ويسعد قلبك و إحساسك
وتعيش و تفرح بأولادك
كلمات الاديب الشاعر.د /السيد علي القن
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة