علي سطوحنا في ضلايه
يحلي كلامنا بحكايه
وفنجان بن علي مهله
بسبرتايه
نقول ونعيد في أحوالنا
وايه اللي شاغل بالنا
جواز البنت شقاوة الواد
وحله محشي قرديحي
وطشه توم تفاريحي
وراجل من الشقا تعبان
يادوب قرشه يدور بينا
مايكفينا
وعايشنها بدعا الوالدين
بعيد حالنا عن السامعين
مدارس عامله مجموعة
وابله دماغها ملسوعه
وجاره بايته موجوعه
ومستشفى ملهش كيان
عشان دكتور عويل وجبان
مقطعنا بسكينه مع أنه
نواحينا واخد اوده علي
السلم
يبعتر فينا ويلملم
وبيقرب قلاديشه
وكام قلدوش نافش ريشة
مخربشنا بخرابيشه
يشممنا رغيف عيشه
نفوق من الوهم ونروح
وكل يوم لنا حكايه
علي سطوحنا في ضﻻيه
وفنجان بن علي مهله
بسبرتايه
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة