شايل بس إيه جواك
وليه بتخبي وتداري
يا شاري الناس وناس بيعاك
بيلعبوا بيك كده أتاري
مش لاقي أنا حضن بيساعني
ولا بكلمه بتصالح
وتملي قلبي أنا واجعني
وكل الخلق بتجارح
ولو فيه فرحه جياني
عني الخلق تبعدها
والروح تئن وصوت وجعها شديد
ومفيش جديد في حياتي يسعدها
وجراحي فيا يوماتي والله تزيد
والصبر صبار وبشرب صبر
وأقول يجوز في يوم
لو مالت الصبر يسندها
معانده دُنيتي فيا
وعند بعند بعاندها
تساومني علي حاجه
تكون غاليه على قلبي
أهددها بخروجي منها
منيش خايف والله يا رب
ما أنا خايف وإنت المتطلع شايف
وعارف إيه بيجرالي
منيش خايف وعارف إن ده قدري
وقدري بيا أنا طايف
في دنيا فانيه مش دايمه
مدايم فيها غير وجهك
سامع يارب لتنهيدات قلبي
ووجع قلبي اللي اتقسم نصين
وروحي اللي باتت م الألام بايشه
وعايشه تحلم تعيش وبس يومين
صابر وراضي وماشي ومكمل
والروح خلاص ما عدتش تتحمل
وضميري فيا يوماتي بيأنبني
إزاي وليه راضي تكون مُهمل
مُجمل حياتك في الفرح سطرين
وبقيت حياتك ب الجراح تكمل
إنسان غريب متقوي بجراحه
زي الورود ب العطر تتجمل
رغم الجراح بتهد في الأوتاد (الجبال)
بلاقيك ديماً وتد
مفروغ عليك م الحديد قطرا
كل البشر ب الحب بتدق على بابك
كل البشر حباك ب إستثنا أحبابك
وكام حد م اللي شافوك وقالوا متكبر
رغم إن داء الكبر والله مهو داءك
رغم إن داء الكبر مش فيك ده من أصله
كل اللي بيعيب فيك بيقل من أصله
واللي يقول ده شاريك في الأساس بايع
ورغم إنه بيأذيك رافض عدم وصله
الحزن أوفى كتير من ناس كتير جنبك
بركان دموع مخزون والذنب مش ذنبك
مليانه عينك ب الدموع يا حزين
ودموعك بتنزل زي سيل ع الخد
مليانه عينك ب الدموع يا حزين
وعشان تداري الدمع
بتقول دي نزلة برد
بركان دموع مخزون والذنب مش ذنبك
بتفيض دموعك ع الخدود تجرح
وكل اللي قال وياك سكاكينوا فيك تدبح
مستكترين الفرحه لو كنت يوم تفرح
مستنكرين الخير اللي إنت قدمته
رغم إنهم أحباب ولا مره دقوا الباب
لجل يطيبوا خاطرك
الحزن أوفى كتير من ناس كتير جنبك
الحزن زي كتاب بتدرس صفاحاته
الحزن زي كتاب منهج ونازل لك
حالف يمين بالله ليقسمك ويزلك
وإنت اللي بتعافر ورافض تكون مزلول
طير حر زي شاهين وعايشها بدراعك
مش فارقه مين خانك ولا فارقه مين باعك
عايش كما فلسطين والحزن شئ كافر
أستوطن الشرايين ومُصر في عنادك
بتحارب كما ف حطين وجايز تكون أخر
فارس من الفرسان رافض يكون مسخره
فقرر يكون ساخر......
(((.. مصطفى دسوقي..)))
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة