وكل قصيده بنشرها
بتسألني كاتبها لمين
اكيد يعني مهيش ليا
ولامكتوبه في عينيا
ولو عددت أيمانك
على صدقك .. نقول ميه
كلام الحب والحسرة
وليل البعد والكسرة
مهوش طالع كدا شيطاني
بدون همزه ولا لمزة ولا تنوين
ولا حتى مشاعر جرحها صاحي
ومحتاجه كمان تسكين
ونون النسوة شيفاها
على برج الكلام عندك
دي تبقى لمين
بتبكي كتير على ماضي
مانيش عارفاه ولا حساه
لكن شايفاه بيشغل كل اوقاتك
وناره قيده في جبينك
وشارده فيك تفاسيرك
ومش واخدين ولا حيز
في تفكيرك
غيابك طال وانا جنبك
مفيش حاجز بيني وبينك
ملوش معنى تعيش بينا
وطبعك حالُه جننا
ملوش معنى اشوف قلبي
مع حزنك صبح شايب
ملوش معنى
يكون حال الهوى بينا
حبله من الظنون دايب
وم الاخر مايشغلنيش
ولايحرك عليك غيرتي
لكن شوفت الخيال
مرسوم على حيطاني
وموج الشك بيخبط
بيخبط في وجداني
بيحكي قصتك انت
مع غيري.. وليه غيري؟!
وانا جنبك بقدملك
فروض طاعتك مع حبي
ومين غيري هيسمحلك
ويشفعلك
ويغفرلك ذنوبك مين؟
وهيسامحك وهيصالحك
وهيكَدِب كمان ظني
ماتزعلشي بقى مني
اذا عقلي هرب سابني
وثارت فيك رياح غيرتي
هترجع تاني وتفتش
على قلبك
تشوف غيرها في تكوينك
تخاف جدا من الفرقة
لكن بردو الهوى دينك
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة