سلمولى على مصر = محمد منصور

سلمولى على مصر

لما تبقوا تشوفوا مصر
 سلمولى ع الشباب

ع الكهولة والطفولة
 والبراءة والعذاب

واللى عايش يومه يحلم
 واللى تايه فى السراب

سلمولى ع اللى ثاروا
كان هتافهم إنسانية
إسالوهم
لسة ثابتين ع الكلام دا
والمبادئ هي هي ؟
 واللا خافوا م الكلاب

سلمولى ع اللى ساكت
طول حياته
ماشى جنب الحيط وخايف
يلعن الثورة فى صلاته
عاجبه حاله
مهما ناله من أذية
مستخبى ب 1000 حجاب

سلمولى ع اللى ناقص واللى زاد
واللى فاتوا
واللى ماتوا
واللى باعهم فى المزاد
اللى باع الثورة لما
خدله كرسى
 ورؤيته كانت ضباب

سلمولى ع اللى مالوا
لعسكرى وقالوا حاميها
اسألوهم عن عيشتهم
 المهانة يرضو بيها ؟

سلمولى ع اللى بايع
أرضها برخص التراب
واسألوه فين الشرف
اسألوه ليه انحرف
 اسألوه ليه الخراب

سلمولى ع الكتابة والقلم
واسألوا نسر العلم
ليه طفش وساب مكانه
لشؤم بومة أو غراب