MAKE Up= ياسر الدميني

كانت حياتنا هاتختلف

لو كنا قلنا اللي احنا لسّه ماقلناهوش
اتنين وخايفين م الفراق
وكتير قوي لحظة بُكا
لكن بتخدعنا الوشوش
كام بنت بتودع حبيبها وبمرار
لكنهم مابكوش ..
..
يا كل كلمة بريئة خفنا في اللقا نقولها
يا كل دمعة في الفراق كانت بترسمنا ..
كام من حوار ناقص
وكمّلناه في أحلامنا
- ازيك انتي وْعامله ايه ؟! .... )من غيري(
- بحاول اعيش ...... )على الذكرى اللي بينا(
- كويس معاكي! ...... )يا رب مايكونش(
- تمام .......... )مخنوقة من غيرك(
كام بنت بتفارق حبيبها وتدّعي الرقة ..
وكام MAKE UP بيضحك
بس طول الليل بيبكي بمنتهى الحرقة
كام حد بيودع حبيبته وقال لها:
بعدك بعيش عادي
وكان قصده:
بحاول اعيش ..
كام بنت من كتر الدموع قالت في لحظة غضب
امشي
وكان قصدها
استني ماتسيبنيش ..
- ليه سبتني ف نص الطريق تايهه ف بكايا
- مش كات يا بنت الناس دي هي رغبتك تبقى النهاية
- مين فهمك إن الجريح وقت الفراق هايقول لك استنى
)للأسف دار الحوار قدام دموعها في المراية(
..
وانا لما شوفتِك في الطريق وسألتي:
- عامل إيه؟!
وانا قلت لك: عايش
كان قصدي عايش ع الحنين ..
إزاي لحد الوقتي لسه ماغيرتناش السنين ؟!
ازاي دموعك هي هي
وضحكتي المخنوقة بتداري الوجع ؟!
)نفس الوجع من وقتها(
لما انتي طول الوقت ده متعذبه في البعد عني
ليه ماقلتيش وقتها ؟!
قررتي قلبك ينتحر ..
ليه لما بنخاف م المواجهة بنختصرها في الصور ؟!
فاكره لما تحني ؟!
عادي هاتفتحي الألبوم
تفري الذكريات!
وتبتسمي ابتسامة حد عامل فيها مش مجروح !
الحقيقة
كل المحبين بعد الفراق
عايشين حلاوة روح ..
كان يجرى إيه
لو كنت تبّتّ ف إيديكي وقلت لك خليكي ..
لو كنت نهنهت ف عياطي
وْكنتي رديتي الدموع دي بسخرية أو بابتسامه ..
أهو خدت إيه دلوقتي انا
لا عرفت اشوفك بعدها
ولا حتى نفعتني الكرامه !
يا كل أحلامي القديمة والجديدة
يا وردة الحب الشهيدة ..
 أصْدَق مَشاهد للأسف ..ماشفتيهاش