الى الواد اللى كان عاشق #فهمى_على

يلف ميدانك الهايج فى ساعة الفجر 
و يحكى قصة الصحبة 
و يلعن ف الفراق و الهجر 
و لافف علمك الطاهر على وسطه و دايب فيه 
و ماسك من سكات حلمه 
و دا مدفيه
الى الواد دا بالتحديد ... مكانك فين ؟ 
و عامل ايه مع الغربة ف وطن تايه مع التايهين ؟ 
بتشكى لمين ؟
و مين لسه بيسمعلك و بيناقشك و تشخط فيه ؟
و صوتك يعلا و تعيط فدمعه يتحبس ف عنيه
و مين على غفلة بيضمك و بيطبطب على ضهرك 
و مين حاول يمد ايديه و يخطف من عنيك قهرك
و طمنى على مهرك 
اكيد كملته و اتجوزت او جايز تكون خلفت 
انا فاكر اوى شكلك فى يوم ما حلفت
هتعمل فى الميدان فرحك و كل المعزومين ثوار 
و اهل الشهدا ع الصفين و جنب الجرحى و الاحرار
و فاكر لما وريتنى صور لصبية بتحبك 
و بتجيلك كتير جدا و تحلم حلمها جنبك 
و كنت عايزنى اكتبلك .. قصيدة شعر ف عنيها 
و اسميها ... حنين ( قلبك )
و لما حكيتلى قصتكم و انا نسيتكم و روحت و جبتهالى و جيت 
و وصيتكم كتير جدا تعيشو حبكم جدا و قلت لكم .. ما انا حبيت
و لما جات و جايبالك كوفية صوف عشان البرد لونها احمر
يوميها ناس كتير مشيت و قالو كفاية .. دا اتغير
سألت كتير اوى عنك و نفسى بجد لو اشوفك 
و باحكى لسه لاصحابى و احبابى على ظروفك
و موت خوفك و حلمك مصر تبقى فى خير 
ما تبقاش تانى متهانة و لا جعانة و كل ميدان يكون تحرير 
لكن صدقنى .. بكره ما جاش و ما قابلناش و شوفت الحلم متكسر 
دموع مسجونة جوا عيون و ناس بتخون و سجن بيعلا و بيكبر 
و انا دورت ياما عليك 
مانيش بالاقيك لكن شبهك قابلت كتير
قابلت اللى كفر بيها .. و دا نسيها ..و دا اتجنن من التفكير
و شوفت اللى الكلاب شتموه و لعنو ابوه و قالو عليه عميل خاين 
و بنو كام سجن علشانه و اهله و ناسه يتهانو و ظلم الظلم بقى باين
و شوفت الكدابين طالعين على الملايين و لابسين بدلة الاشراف 
نفاقهم صوته بقى عالى و بيلالى و شوفت الناس بتاكل حاف
و لما الخوف بقى مألوف و كل الناس بقت خايفة 
نسيت اسأل عليك نفسى و من يأسى عنيا خلاص ماهيش شايفة 
ما انا انت .. و بالحتة دفنتك فى الوجع و مشيت 
برغم انى كبير عنك .. فانا منك .. لكن صدقنى .. توهت ... نسيت