ليه يا ليلى جاى بدرى
و النهار لساه بيحبى
ليه مقرب ليا تجرى
ليه بتخنق فيا صاحبى
كنت سيب الصحبة حبة
امشى بيها فى الحياة
اقرا بيها كتاب محبة
او الاقى طوق نجاة
ليه يا ليلى جاى بدرى
تخطف الحلم الصغير
اللى لسانى هاشوفه
و ابتدى من عنده اغير
كنت ناوى بجد اغير
كل حاجة مش مقاسى
اسمى .. رسمى .. خط سيرى
حتى قلبى لأنه قاسى
انسى ميت عنوان عرفته
و الطريق منهم و ليهم
ناس كتير ف حياتى مروا
كنت مرة فى يوم شاريهم
سرقوا من جوايا روحى
كت حروفهم سيف بيجرح
بدلوا بالدمع ضحكة
قلبى بيها كان بيفرح
حتى احلامى البريئة
داسوا فيها و قالوا ماتت
حتى لما حكاية تحلا
يمسحوها .. و تبقى فاتت
جاى ليه و انا لسه بادئ
فى الطريق و باقول يا هادى
و السما بتفتح بيبانها
و بسنينى هابقى راضى
حتى سكة بكره بانت
بعد ما يأست انى اشوفها
و الحياة ضحكت لى فجأة
كعبة و اشتقت انى اطوفها
جاى ليه .. بالله تسيبنى
ابقى مرة بجد نفسى
احضن الحلم بعيونى
و انسى من جوايا يأسى
#فهمى_على
دار نشر القلم للطباعة والنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة