ابنك اللى عاش يناير
و انجرح برصاص جبان
و اللى شال علمك و غنى
و اللى ناملك فى الميدان
اللى صاحبه مات فى حضنه
و اخته نامت ع الرصيف
و اللى ساب فى عنيكى حلمه
و اللى حبك فيه عفيف
ارمى احلامك فى حجره
و انسى بكره الجاى فى ايده
دا انتى عشقك جوا روحه
هو فرحه .. هو عيده
فى الليالى هو قمرك
فى النهار نورك و ضلك
مهما غبتى عن لسانه
هو دايب فيكى كلك
اسأليه تلاقيه يجاوب
عن سؤال توه خيالك
عنده و لا مليون اجابة
حبك انت ماليه كأنه
بيكى اصبح م الصحابة
روحه ... ترخص لو عشانك
عمره .. ارخص من دموعك
انتى حرماه من حنانك
بس واثق من رجوعك
فارجعيله و بوسى راسه
و اندهيله هتلاقيه
ما انتى اصلا سر بكره
اللى عاش يستنى فيه
مدى ايدك ... ضمى ايده
حسسيه بوجوده فيكى
مصر يا ام العشق انتى
و القلوب مليانة بيكى
اوعى تانى تسيبى حلمك
بين ايدين الكدابين
لملمى ولادك و قولى
احنا دول ... طب هم مين
#فهمى_على
دار نشر القلم للطباعة والنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة