بمناسبة يوم المرأة العالمي:
تحية لستي لي كانت تمشي ٣ كم الساعه ٤:٠٠ الفجر لتْعبِّي ماي من العين وتجي تشِك دخان وتطبخ وتغسل عالحطب ل١٠ اولاد، تحية لجارتنا الامية الي كانت تقنع اولادها انها بتعرف تقرا وتسمِّعلن دروسن حتى صاروا مهندسين ودكاترة. وبمناسبة هذه الذكرى ما في الا ما اذكر المرأة الي كانت تبسط تبيع المحاصيل بالسوق حتى تبعت مصاري لإبنها بفرنسا حتى صار دكتور، والمرا يللي تبعتني إمي لعندا جيب لبن، ويلي ربِّت ٥ أيتام من خير ٤ بقرات فيهن واحد شهيد ورجل أعمال ناجح، ويللي كانت تقنعن إنو المجدرة اكله مهمة بياكلها المصارعين ليصيروا أقويا، وتقوِّي ثِقتُن بنفسن رغم الفقر والشحار والتعتير، والمرأة يللي كانت عم ترش زيت مغلي عالجنود الاسرائيلية وترشقن بالحجارة ،...
إنتو مش متعلمين و لا بتعرفو شي عن أساليب التربية الحديثة ولا يمكن سامعين بحقوق المرأة ولا عندكن حواجب عراض ولا تاتو ولا فيسبوك، وإيديْكُن مشققين من الشغل ووِجْكُن محروق من الخبز عالصاج لتطعموا ولادكن بس انتو أسستو أحلى مجتمع، إنتو أحلى نسوان العالم
#يوم_المرأة_العالمي
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة