الروح جوايا = الشاعر يسري خليفة

الروح جوايا
باصة علدنيا
من خرم الباب
كداب
سامعين زغاريد
الفرح بناس ناجحين
فالحين
لفينا العالم كلة
شمال ويمين
فاهمين
وكلام عن وحدة وطنية
وعيون وعوالم خلفية
شاهدين
على ام العالم والدنيا
سامعين
ياشوية بنى آدمين
خايفة من السمنة
ومن الامية واحنا
جاهلين
وبقينا نسمى كل عشتنا
بناس تانين
حاسين
ان بكرة موش جاى تانى
ولا بعدة هنكون عايشين
ولا اى كلام
وانا روحى بصة
عالدنيا من خرم
الباب
خايف اصحى
او ابقى او اكون
انسان
مجهول مشهور
ولا حاسس بأى امان
مسروقة طعم الايام منى
مخنوقة الروح ولا بتغنى
شهقانا ولا عايزة
تخرج منى
من طاقة لطاقة
لبطاقة ولصورة
متعلقة على حيطة
وعليها سودة شريطة
روح المرحوم مزنوقة
مستنية فرج الرحمن
درويش
متخبي جوة قميصة الخيش
بيقول كلمة ويقطم قطمة
من لقمة عيش
مداري جوة عباية شيخ
والروح جواة سكرانة
ومسطولة بقرش حشيش
درويش ومفيش
اى غرابة انة بيعيش
سايح نايح فى الدنيا ملوش
والسكة بطولها وعرضها مليانة
بأيدين دراويش
والروح جواهم بتعافر
من كتر سؤال
من خرم الباب
الشاعر يسري خليفة