تعَدّي بحارتنا
قصيدة بالعامية
*
لما تعَدي بحارتنا
عندك حجّة.. جارتنا !
ضيقة كتير حارتنا
هالحجّة مالها معنى
َدَوّري ع غيرها تقنعني ،
*
ولوو شو هالطلة
ماشيَه وبتشمي الفلة
والله ساويتي بقلبي ألف علّة وعلة
ليش بدك تعذبيني ،
*
ماشيه .. بتتمختري
تدلَلّي .. تدَلّعي
ما حدى .. بتعبّري
وبقلّك ياها بالمصري
*
عشان أنتِ حلوة اَوي
عاملة فيها جامدة اَوي
بُصي بئه ده نا حبيتك اَوي
كفاية تدوشيني ،
*
قوليلي شو غايتك
بدك العنب ولا تقاتلي الناطور
بتسلمي ع جارتك
وحَدِّك أنا و كأني شرطي مرور
ما بكتبلك مخالفة أطَمّني ،
*
عنادك ما بينفعك
وهالغرور ما بيلبقلك
ومحمرّة خدودك
وعيونك ع شباكي ،
*
عَدي من حارتنا
و اَطَلّعَي بشباكنا
وأرميلي هالفلة وخليها تبلش قصتنا
وتحكي الجارة لجاراتنا
و على كل لسان تكون سيرتنا
انا وأنتِ يا المعديَّة بحارتنا
عم تكشفنا نظراتنا
انا حَبيّتك و أنتِ حَبيتيني
*
محمد محمود علي
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة