أنا اتجوزت قلت اطلـــــع ..... لدنيا حلـــــوة ورديـــــــة
وقلت ده فارس احـلامـى ..... يحـــقق ليــه أمانيــــــــه
وبعد ماكان بيتحكـــــــــم ..... أبويــــه واختى سعـــدية
هكون فى مملكة وحدى ..... وأثَّر فى اللى حواليــــــه
حبيبى كان قريب منى ..... مـابيطقش أغيــب ثانيـــــة
قضينا شهر فى الجنـــة ..... ده لو فيه جنة فى الدنيا
وبعديها اتقلب خالص ..... مالص بالص ياافنديــــه
يكشَّر وشه فى الدَّخْلَة ..... وفى الخارجة سواسيـــه
يغيب بره وجيت اسأل ..... فقال تتحكمــــى فيــــــــه ؟
وقلت انا قصدى اتطمن ..... يقولى مفيش حاجة تانية
وداب الشوق وكلماته ...... أُصيب بسكتــة زوجيـــــة
كغيره من رجال تانى ...... بيشنقوا فى الرومانسيــة
وبدأت أمه واخواتــه ..... مسلسل حـــقد وأذ يـــــــة
حاولت كتير أكون هادية ..... ولـــكن طلـــعوا عنيــه
وهو كتيــــر يصدقهـــم ...... ومد كمـــان ايده عليـه
وده العادى فى كل زواج ..... ياريت الأمــر باديــــه
وأهلى كمان مانصفونى ..... وقالوا استحملى شوية
ونفسى افهم ليه الراجل ..... يعيش طاير بحريـــــة؟
وليــه احــنا بنتحاسب ..... بلقمـة ذل مش هيــــــه؟
وعدنى كتير فى خطوبتنا ..... بفسحـة ولعب تسلية
وبعد جوازنا قال مشغول ..... بكيت قالى انتى نكدية
بقيت عايشة ومش عايشة ..... وجف الدمع فى عنيه
لــو اطلــقت واتجــوزت ...... ولادى هيصبحوا ضحية
وهــو كمــان لواتجـــوز ...... ولادنــا هيبقــواملوخية
مخارط عِنْد والديهم ...... وزوجـــة أب (ســــاديَّة )
سمعت فى يوم لشيخ عَالم ..... بتسألوا واحدة زييه
حكالها عن رسول الله ..... معاملــة جميلة مثاليــــة
حلمت بزوجى فى مكانه ..... صحيت على شخطته فيه
حسن رمضان الواعظ
الإثنين 13/3/2017
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة