و تصحى ف نومها يغلبها
حنين و اّلام
و تيجي تنام يغلّبها
السهر أوهام
تغالب دمعة مكبوتة
بتحكي هواها حدوتة
عن البنت الصغنتوتة
و فارسها اللي ف الأحلام
عن الأيد اللي مربوطة
وخايفة تمد بيها سلام
و تحضن حلمها ف ثانية
تمُر قوام
تقول الرَك ع النيّة
يقولوا حرام
و تكبر تلقى ف الدنيا
حاجات تانية
تطبّق حلمها تنية
ورا تنية
يفوت العمر والأيام
أنا الدنيا اللي حابسها
حارسها ف ضلفة الأحلام.
شعر ..
حسام بخيت
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة