يا عم ياللي راكب
عجلة الزمن
وديني عند أبويا
وادفعلك التمن
واجيبلك منه حكمة
واّهو ناكل عنده لقمة
واشكيله من الزمن
زمني اللي كان معايا
صورتي اللي ف المراية
حَط الشيب ف الزوايا
و قال لزوم السِن
شيّلني الهَم بدري
قالّي أختصِر ف عمري
ده مهما ياصاحبي تجري
مش هاتلحق الزمن
ياعم ياللي راكب
عجلة الزمن
أديني لفة بيها
وادفع لك التمن
أديني لفة بيها
ع الدنيا و حكاويها
واشوفلك بكرة فيها
و خد البطاقة رَهن
وان عُدت أبقى أديهالي
وان مُت أبقى أنساهالي
ولا شيء يشغلّي بالي
ا،لّا الناس والزمن
ياعم ياللي راكب
عجلة الزمن
وديني عند أبويا
وادفعلك التمن
واجيبلك منه حكمة
واّهو ناكل عنده لقمة
واطمِّن ع الوطن .
شعر ..
حسام بخيت
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة