لو هدك الزمان
موش هقدر أبنيكي تاني
موش هقدر بعزمي أبني في الدنيا وجودك
ولا بصبري أرسم تاني خريطة حدودك
معدتش أنا زي الأول
ولا عاد الزمان نفسه زماني
لو هدك الزمان
موش هقدر أبنيكي تاني
......
خيولي بعد الجري هدها السبق
وبحترت أنا تيني وأكتفيت بالنبق
ومن بعد الجري في مضمار الزمان
بركت أنا مكاني
لو هدك الزمان
موش هقدر أبنيكي تاني
........
معدتش زي زمان بنفس القوة
ولا صرت من بعد فتونتي أنا الفتوة
بعت الفتونة على باب حارتنا
ومن بعد الجدعنة بقيت أناني
لو هدك الزمان
موش هقدر أبنيكي تاني
....
معدتش زي زمان فارس زمانك
أشيلك على كف يدي
وطيبلك الدنيا مكانك
صرت أدوب أحق طريقي
ورجلي بالكاد شيلاني
لو هدك الزمان
موش هقدر أبنيكي تاني
....
كنت بداوي جروحك
محتاج ليكي تعالجي جروحي
وكنت أفرحك بعمري وشبابي
محتاج ليكي على عجزي تنوحي
ومن بعد سمسرتي في سوق الزمان
بعت أنا أحلامي
لو هدك الزمان
موش هقدر أبنيكي تاني
........
كنت بأرسملك في كل بحر طريق
وفي بحورك أنا البحار منقذ كل غريق
ومن فشلي في الرسم
قمت كسرت أنا الواني
لو هدك الزمان
موش هقد أبنيكي تاني
....
من عزة نفسي بنيت نفسك عزيزة
وجملتها بالمودة
وخليت التسامح فيها طبع وغريزة
وكتب في الوجود
وجودك وجودي وعنواني
لو هدك الزمان
موش هقدر أبنيكي تاني
....
بمدرستي كنتي تلميذة بمريلة قديمة وفلونكات
علمتك حروف الحب نطق وهجاية
وحركات وهمسات
وفجأة لميت أنا دفاتري
وفضلت أستمع ليكي مكاني
لو هدك الزمان
موش هقد أبنيكي تاني
....
موش هعيش الحياة مرة تاني وأعطهالك
لو عشت الحياة مليون مرة هاوهبها عشانك
سرق الزمان مني عمري
وعاقبني أذا عطاني
لو هدك الزمان
موش هقدر أبنيكي تاني
.....
كنت بداريكي عليكي من الريح يوماتي
وأهفهف عليكي بكم توبي وأفديكي بحياتي
من شدة الريح أتخرم أنا حجر توبي
وسروالي لما أتشرك عراني
لو هدك الزمان
موش هقدر أبنيكي تاني
....
كنت في قلبي أرسم ملامحك
وعقلي سارح معاكي
وأعبي التراب في حجري وأردم
حفر تعرقل خطاكي
ولو زاد في يوم همك
همي أنا شقاني
لو هدك الزمان
موش هقدر أبنيكي تاني
......
قلم/عبدالسيد عبدالفتاح حامد(شاعر الجنوب)
الخميس30/12/2021
حقوق الملكية محفوظة
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة