ملك محمود الاصفر تعترف : حبك ندهلي

حبك ندهلي فتحت لورود

بيت الأحبا ضوى مصباحو

اسمك حفرتو بالقلب والروح

والقلب رفرف سلم سلاحو

هب الهوى وتعانقوا القلبين

صار الهوى يمرجحنا برياحو

صرت الكحل والنور بالعينين

قلبك ملكتو بإيدي مفتاحو

....................

حبك ندهلي الفرح عنا طل

والخد لوح فيه تفاحو

صار البنفسج يبتسم للفل

والكون زادت فيه أفراحو

شوف الغصن أخضر عإمو ضل

توشى بزهور وشو حلو وشاحو

حتى البلابل غردوا بكير

غنوا قصايد للهوى وباحوا

.....................

حبك ندهلي عبقت لزهور

وكل العطور ببيتنا فاحوا 

وتمايل النرجس مع المنتور

وكل الطيور بقربنا صاحوا

حتى اليمامة ندهت الشحرور

حطوا بحقلتنا وما راحوا

والشمس طلعت شقشقت بالنور

راح القمر ونجومو يرتاحوا