ألابنده الدنيا دي ألابنده
عايشين في بيوت ولا لوكانده ؟
واهي ماشيه الدنيا بخطاوينا
بلكونه كبيرة من غير تنده
ألابندا في ناس عايزه الفوضى
وإن صلِّت عايزة ما تتوضى
وتقول واللَّهِ ما تفرقشي
بلا تعب القلب بلا مناهده
فى ناس مرتاحه وبزياده
وتمرجي بيفتحله عياده
وإن قلت يا عم دي نصبايه
حيقولك مانا بادفع فِرده
وفى ناس مرضانه وضعفانه
الدنيا معاهم خربانه
واللقمة ماهُمَّاش لاقيينها
تعبانة مع الناس الجامده
وغلابة عايشين بالطول والعرض
نايمين ع الأرض ف عِز البرد
في الفقر ينافسوا ف بعضيهم
ويعدي اليوم من غير فايده
ساحبانا الدنيا وواخدانا
ولا مرة ف يوم جت ويَّانا
معرفش انا ليه معانده معانا
عايزانا نعيش بالالابنده
عايزانا نعيش بالألابنده
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة