الشاعر جمعه الجر يكتب : .خدى وقتك.

خدى وقتك..وكمان على أقل من مهلك...

وبراحتك اجرحينى اوجعينى..

مش راح اشكى وأقول كفايه..

تجرحينى مش حكايه..

ماانا أصلى واخد عل الجرح منك..

كم ألف مره تجرحينى واقول لقلبى كان غصب عنك..

إيه فاضلك جوا منى غير بقايا..

حتى بصى فى المرايا..

تلاقينى مرسوم على جبينك..

ويا تجاعيد الذمن..

حقيقى قلبك أصبح على قلبى مش مأتمن..

ماانا أصلى واصل لوريدك وشريانك..

اصب شعرى جوا منك..

لجل مااحيا فى يوم عشانك..

أكون كيانك..

وتبقى معنى الحياه فى ذاتك..

مش حياتى مربوطه بحياتك..

حتى اسالى كل اللى كان من ذكرياتك..

مش إحنا برضو دم واحد..

احساسنا واحد..

حتى الوجع لما كنتى بتحسى بيه.

كنت أحسه جوا قلبى..

كان إيه بس ذنبى..

إنى شوفت الكون بعينك..

إنى عشت جوا ف سنينك..

وإن كل ذره فيا لسه بتناديلك..

طب إيه دليلك..

إنى لسه جوا قلبك..

حبة دموع ويا الكلام لما أنسى يوم واعاتبك..

قولتى إيه مستنى ردك..

دلوقتى راح الكلام..

ازاى أنام..

وأنا كل مافيا موجوع ببعدك..

وانتى شايفه وبرضو ساكته وكأنه عاجبك..

         طب براحتك...