بكام الفرحة يا معلم ....
يا ريت تتوصا علشان قلبي ما فرحشي بقاله سنين
وقولي منين أجيب رحمة
عشان دنيتنا ما بآش فيها بني ادمين
صحيح قولي...
سألت كتير علي عمي اسمه أيه دا اللي
بينشر خير ..
قالوا لي الناس تعيش انت
دا مات يا ابني بقي له كتير
وحتي بناته من بعده ..
بأرخص سعر باعوا العفة والمعروف
وليهم أخ من حزنه ما عدش يشوف
عايش في الدنيا يا ولداه كأنه خروف
ياعم بجد نسيتني انا جيت لك وعايز أيه
ما عندكشي شوالين إحساس
أروح لأمي عشان تخبز
واوزعهم هناك ع الناس
وهات لي كمان..
شكارة ملح من عندك..عشان يتمر
بيبقوا اخوات ومابيتمرش فيهم ملح ولا عشرة
وبنقول ع الرخيص غالي
وفي الأخر تلاقيهم ..دهب قشرة
ياعم خلاص هتنفخ ليه..؟!
مادام عجبك خد الطبلة وروح طبل
ما هي الدنيا دي فيها الكل بيهبل
علي رأيك ..أنا مالي ..
حارق دمي ودمك ليه ..
بجد يا شيخ ما انيش لاقي كلام يتقال
ناولني تناحة واستهبال..
ولو فيه باقي هات لي معاك برود بجنيه
وحاسب أصل تستهوي..
وكيس قهوة..
ورش عليها رشة سم
وخدها هدية مني للي ماعندوهش..
نقطة دم ..
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة