خاصمت الشعر وخاصمني
ومن كام شهر كلمني
وقال مشتاق
ما تيجي أنا وإنت نتصالح
علي الأوراق
تبوحلي بسر يفضل سر
ويبقي الحبر بنا شهيد
يا ليلة العيد في
حين ان إنت توافقني
وترجع تاني ترسمني
على سطورك أكون نورك
وأفكارك تزين بيا
كراستك وكشكولك
أكون حملك ومحمولك
وأكونلك حلم بتخططله
لجل ما يجي يوم توصل
هكون وياك أنا أجمل
هنسترجع سنين فاتت
ونكتب لينا حاضر حي
وهنخطط ليومنا الجي
ونحيي حاجات كتير ماتت
هنكتب شعر مش موجود
هنتجاوز حدود الشعر
هنتجاوز حدود الشعر
بكم رهيب من الإحساس
هنوصف نفسنا والناس
ونوصف شئ مهوش موجود
هنتجاوز حدود الشعر
رغم الشعر مش بحدود
خاصمت الشعر وخاصمني
ومن كام شهر كلمني
وقال مشتاق
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة