وانا هكتب لمين غيرك
ومين غيرك هيسكني
بحور الشعر والقافيه
بأوزانه وأبياته وتفعيلته
على غيابك بتتكسر
انا غيرت أحكامه كدا عافيه
وتمشي حروفي في سطوره
على قد الوجع تبكي وتتكفى
هألف بحر في عينيك
يكون مخصوص بقى ليكي
وهكتبلك قصيدة تكون
عاميه الحِس مش شايفه
بترفض كدب أبياتي
ولو مش قادر
أنشرها ولا احكيها
على الناصيه
بتبقى حالتي كدا حاله
وأشوف أخباري في النشرة
واقوم مغلوب بكام بصره
ورغم أن الورق مكشوف
وكان عشمي بقى أكسب
قلب إيده في اخر الدور
حاولت اهرب وملعبشي
لقيت نفسي مانيش موزون
وبتطوح على الجانبين
كأني للألم موصوف
تايه وماشي مع الزفه
واهز دماغي واتخفى
كما الدرويش
بلف في دايره مقفوله
واعيد في اللفه 100 لفه
تاخدني الرعشه والدوخه
واطير مأسور ومتكلبش
مع دموعي
سحبت كروت على حظي
لقيت الحكم بالرأفه
وآخر صف مش مضمون
وقفت وماسك الدفه
وبرسم فوق على بابك
علامة نصها استفهام
وسوء ظنك مهوش عاوز
ينوب عنك ولا يعدي
بلا استئذان
يخيَّل لك من الخضه
بإنى شيطان
ما تشغلش بقى نفسك وتفكيرك
ماهي الدنيا ومن غيرك
بقت احلى من امبارح
وريحها خفيف
ولا مرة خطرت في مرة
على بالى
ولا جرحك هيبقى رهيب
وهكذب كل يوم واحلف
باللي كان بينا
حقيقي بجد صدقني
مافيش مرة بتوحشني
ولا مرة اخذت
مساحه م التفكير
وحيد علي الجمال سرس الليان محافظة المنوفية جمهورية مصر العربية
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة