.jpg)
..................
و صحيت م النوم وسط الدوشه
و لقيت الدنيا دى مقلوبه
و العاطل بيشوط ف الباطل
و اللقمة دى هى المطلوبه
دا ولادنا بتدرس و تكافح
وبتجرى كمان و بتتعذب
و را حلم حزين
و دا يحلم مرة يكون ظابط
أو مره طبيب
و الأب يقطع من قوته
و كمان بيقطع ف هدومه
لأجل التعليم
و الأم تصحصح من بدرى
و تصحى عيالها المهدوده
من شيل الشنطة المليانة
كراريس و حجات
و دا عيل مش عايز يصحى
خالص م النوم
و التانى دا عمال بيمكر
عامل عيان
علشان ما يغيب من مدرسته
زى المقاطيع
و التالت عمال يتلقح
ف شمال و يمين
يفرك ف عيونه و يتاوب
عامل كسلان
و الرابع عمال بيعيط
و يقول ع الواجب معملشى
و الضرب هناك مستنيه
و النحلة تلف خليتها
و تهز النايم و تهدد
و معاها خرطوم
و ساعات الشبشب يتحرك
و كأنه صاروخ
تعمل ف فطار كدا و تلبس
كل العفاريت
عماله تفتح ف الفينو
علشان تخلص من وش اليوم
وتلف من الناحية التانية
زى الدباير
نطلع م الدرس على التانى زى المساطيل
هنا درس رياضه يا أهل الله
و ياها علوم
و هناك بنروح و بنتاخر
على درس لغات
دراسات ولغتنا العربية و ف كل مكان
نضرب تزويغه على السيبر
و نقول ترفيه
والأسعار طالعه بتتجنن
زى الشياطين
و الأب بيجرى و مش لاحق
و الأم كمان
ف طاحونة الكل بيتعذب كل الايام
و ضباب المستقبل حاطط
على كل الروس
و الامل المتزوق باسود
ف عيونا كتير
و عيون الراجل و مراته
رغم الازمات المجنونه
مليانه حنان
و أمال الدنيا ف قلوبهم
و معاها دموع
و بيدعو المولى لأولادهم
يصلح الاحوال
ويبارك ربى ف أعمارهم و يكونو بخير
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة