#كَسر_لُقْمَة بقلم / #فهمي_علي

طباعة ونشر وتوزيع ، ظهور إعلامي ، ورش أدبية

لِسَّه فِيه فِ القَلب حِتَّة 

بِيضَة .. مَلياها  البَراءَة 

مِن زَمان جُوَّايا سَاكنَة 

كَارهَة لِحرُوف البَذَاءَة

الغَريبَة باحِس بِيها 

بَس مُش باحكُم  عَليها 

مَهْمَا اشُوف مِ الخَلق قَسوَة 

والحَياة مُش بِتراعِيها 

هِيَّ حِتَّة ف قَلبي سَهْلَة 

مُش تِقول غير بَس سامِح 

تِنسیٰ جَرح كبِير كَأنُّه 

سِيف لِفارِس فَرَسُه جَامِح 

مَهما أقُول مُش هَانْسىٰ واصفَح

ألْتِقيني نسِيت وصَافي 

نَاس كِتير كَت رُوحي لِيهُم 

حُضن طَيِّب ..  قَلب دَافي 

بَهدِلُوني ..  نسِيت عَشانْها  

غَصب عنِّي مُش بِكيفي 

النَّهاردَه أكِيد هاخالِف

هابْقیٰ كِيفهُم ..  لِيَّا سِيفي 

مش هَتِبقي الدُّنيا هَمِّي 

بَس هاخُد حَقِّي مِنهُم 

مش هاسِيب ولا كَسر لُقمَة 

حتیٰ لوْ كانِت فِ عِينهُم

أعذُروني يا كُل ناسِي 

يالِّلي مَا مَسَحتُوش دُموعي 

فاضِل ايه .. مَا العُمْر وَلَّیٰ 

ولا يَعني استَنَّي جُوعِي ؟