الشاعر جمال زكى عينر يكتب : ( بالراحة )

بالراحة وعلى نفسك حاسب

مش راح الومك مش راح اعاتب

تظلم تعدل أو تتجنَّى

رب الكون ع الذنب يحاسب

إعمل وبراحتك ما بدا لك

أي أذيَّة حتيجي ف بالك

اهجر اغدر روح واتبدِّل

مش شاغلاني كتير أحوالك

فاكر نفسك كده حتغيظني

وإن عمايلك حتنرفزني

خدت خلاص ع الهجر وبُعدك

مش راح أشاغلك ولا تشغلني

حتعيش عمرك كده بتحوَّر

ع الأوهام تبحث وتدوَّر

وسنينك راح ترحل عنَّك

ولا عمرك أبداً تتغير

روح دوَّر على غيري ولوف

وإنسى الخير وإنسى المعروف

عمرك ما حتلقى الحِنيَّة

ولا عينك غير حبي تشوف

ماعادتش بتفرق أنا عندي

وبمشيها وكُله يعدي

لكن لو ع العند حعاند 

وساعتها ما تقدر على عندي

امشي براحتك مِيل واتطوَّح

لازم ييجي اليوم وتروَّح

بس يكون على بيت غير بيتي

علشان تبكي كتير وتنوَّح