عبده أفندي حس بإنه
كل الدنيا استغنت عنه
وإن مراته ماهِش طايقاه
وإن حياته بتهرب منُّه
حس بإنه خلاص مش عايش
وإن الكُل عليه إتجنُّوا
راح على دنيا جديدة يدَوَّر
جت شياطينه ف وِدنه وزنُّوا
فجأة بنيَّة ولابسة قصيَّر
مشيت جنبُه عيونُه اتجنُّوا
رفع الكاميرا ف ثانية وصوَْر
نسي ويَّاها الهيبة وسِنُْه
غمز العمزة بعينُه العُوجة
قالَّها نفسي لقلبي تحِنُّوا
تاه في خيالُه وركب الموجة
صدَّق نفسُه وصدَّق ظَنُّه
عيني عليك مسكين يا أخينا
اللي شافوك بهواهم ضَنُّوا
ولا يوم حتَّى رسيت على مينا
والأيام راح تثبِت إنُّه
نَقبَك فَل وجه على شونة
عبَطَك ده مش راح ييجي منُّه
عبده أفندي جَتَك ميت نيلة
عَكَّك ده راح تدفع تمنُه
عبده أفندي جَتَك ميت نيلة
عَكَّك ده راح تدفع تمنُه
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة