.....((( بعد ابوكي ))).....
بعد ابوكي ما مات يابنتي
عايزه أقولك كلمتين
حسه كان ف الدنيا عندي
حصن أمان م السنين
دخلته بالليل عليا
أغلي من نور العينين
بعد أبوكي ما مات يابنتي
كل شئ أصبح حزين
الهدوم اللي في دولابه
لسه ليه مشتاقين
والمداس اللي سابه
سامعه صوته و الأنين
وإلا صوته و هوه راجع
فيه دفا و فيه حنين
شخطته في البيت مهابه
أو أمان للخائفين
أما خوفه ع الحبايب
هوه ده الاب الأمين
لسه روحه بينا عايشه
واخده حس المحرومين
لسه حنية أيده
ع الغلابه و اليتامي المساكين
ياه يابنتي
بعد ابوكي ايه فاضل لي
غير سيرة الطيبين
لما مات ابوكي ساب لي
سيره حلوه للسنين
لأجل خاطر كان ضميره
في الحقوق حارس أمين
لسه بين الناس شهامته
تحكي أنه كان آمين
في الأمور أحكامه نافذه
حكمه بالحق المبين
كل حاجه فيها خبره
لأجل بارع أو فطين
بعد ابوكي ما مات يابنتي
كل شئ أصبح حزين
الحيطان عليه بتبكي
و أسالي سورة ياسين
لما كان يرجع لي بدري
كان يصلي ركعتين
كان بيختم في الكتاب
مره كل جمعتين
ألف رحمه ونور ياغالي
توصلك في العالمين
بعد أبوكي ما مات يابنتي
جف دمع كل عين
حتي راحة البال سابتني
ما ادري راحت مني فين
والكلام الحلو بينا
لسه شايلاه في العيون
بعد ابوكي ما مات يابنتي
ليكي عندي ميت وصيه
منها تفتكريه ف دعاكي
أو تربي أبنك ضناكي
زي جده اللي عطاكي
كل حاجه في صباكي
اللي لولاه ما كنتي
واللي اسمه لسه باقي
إللي كان في حبه راقي
وعمره ما اتغير يومين
كان تملي قلبه طيب
ويا كل الناس أصيل
بعد ابوكي ما مات يابنتي
الحنان في الدنيا فين
خد معاه كل حاجه
واحنا بعده محرومين
بعد ابوكي ما مات يابنتي
لسه ليه مشتاقين
لسه فينا قلوب بتبكي
ع الليالي و ع السنين
ده اللي كان حامينا هون
واللي كان جامعنا فين
بعد ابوكي ما مات يابنتي
فرقت بينا الليالي
وغيرت فينا السنين
كل واحد راح في حته
واختفي الود القديم
بعد ابوكي ما مات يابنتي
نشتكي طيب لمين
غير لوجه الله تعالى
هو رب العالمين
هو رب المظلومين
ألف رحمه ونور يا غالي
وفي دعانا نقول آمين
يرزقك بالجنه يابا
ده جزاء الصابرين
كلمات الاديب الشاعر السيد علي القن
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة