فاكره يا اما
فاكره لما
كنا لمه
علي بعض جمله
قاعدين في اوضه
تجمعنا ضحكه
وطبليه واحده...
فاكره
حتي المذاكره
علي اللمبه
ايوه لمبتنا الجاز
ايام لذاذ
طلعتنا رجال عزاز...
بنفوسنا صافيه
ودافيه وافيه
وعاملين زحمه
فاكره
ودولابنا الشماعه
وحصيرتنا الواحده
وبنسمع الاذاعه
واحنا علي المخده
وحشتني والله
وحشتني اللمه...
فاكره
صدقيني يا اما
ووحشوني هما
ولي لازم مناسبه
ولازملها حسبه
وعيد فطار...
وعيد لحمه
وحشتني الزيطه
والزمبليطه
ورسوماتنا
عل الحيطهّ
وشكلتنا العبيطه
عل اي رسمه
آدينا متلككين
علي الفرحه
فاكره يا اما....
بقلمي /سيد صلاح (علاء)
آللهم إشفي أمي وعافيها
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة