شجره سنت بقلم ياسر الدمينى

كان يوم قايم في مهموم
ودخلت لبست اي هدوم
وخرجت وجوايا سكوت
وفرح جوايا بيموت
كان قلبى خايف من الموضوع
كنت مستني نتيجه بفرح موجوع
بقالى سنين عايش كشجرة سنت
ولا تطرح حاجه تفيد غيرك
وتجرح اللي  بيلمسها
وكل الناس تبعد عنها
وتخاف تلمسها لتجرحها
ساعه مادخلت على الدكتور
و نتيجتى في أيده وساكت
قلتله اتكلم ساكت ليه
قاللي بكل هدوء موجوع
و سبقها بلحظه صمت
قاللي انت كشجرة سنت
لا فيوم هاتطرح شئ
و هاتفضل طول عمرك شجره
نشفت جدرانها
وبكيت مش علشاني
لكني بكيت علشانها
ليه تفضل مظلومه معايا
وتعيش على حلم كتير بيموت
والعمر قطر بيجري وكل يوم بيفوت
ورجعت البيت ماليني سكوت
مش عارف ابدأ من فين
واقول ازاى اني هافارق
وده مش ليه
علشان تحقق حلم مش عندي
و تجيبى اللي بتقولى سندي
جمعت بكايا في ركن القلب
و مسحت دموعى قبل ما اتكلم
قلتلها خلاص الحدوته
و الشجره طلعت مربوطه
وانتي مستنيه الطرح
وقاعده على أمل كاذب
انا نويت نبعد على طول
وتشوفي طريقك من غيري
لأن الظلم بقى موضوع
وعشان قلبك يطمن
مش ناوي اجرح تاني
ومش هابقى اناني
مع ان كلامي بيجرحني
بس لازم نتفرق
عمال اقول في حاجات
تخفف الهم اللي عندي
كان الرد منها دموع
وقلب كتير موجوع
وعشان تغير من الموضوع
قامت ضربتني
وقالتلى ناوي تسيبني لمين
هو احنا مش كنا عاهدنا مع الايام
أن اللي مابينا هايفضل
و فراقنا وهم واحلام
خدتها في حضني وقالتلي
ياللي انت ابني وانا بنتك
تفتكر هاعيش لوسبتك
مسحت دموعى ودموعها
وساد الصمت
ودي قصه لشجره سنت