صحيح باحلم
و حلمى فيكى مش ممنوع
ما انا جيت الحياة بيكى
و عاشقك ... هو دا الموضوع
كتير لفيت بلاد الله
و فى وشوش البشر بصيت
و شوفت كتير اوى شبهك
ما دقش قلبى .. و لا حنيت
و ياما سهرت ليل فيكى
و كلمت النجوم عنك
وصفتك للنجوم صمتا
حلفت لهم كتير انك
صبية من بنات الحور
ف يوم هتجيلى م الجنة
فيطرح فرح جوايا
و اعيشها بجد ... و اتهنى
فا هاستنى
و اعد ثوانى فى بعادك
على ثوانى
و اطاوع شوقى و اشتاقلك
و انقى حروفى و اكتبلك و اروح قبلك
على العش اللى فيه كنا
لحد ما تندهى اسمى و تترسمى
على لوحة سنين عمرى
و اسيب قمرى
يسافر فى السما يحكى عن العشق اللى هنكونه
و انا اصونه
و يفضل بينا الف طريق
و حب برئ
فى نن عنينا هنشيله ...
نغنيله
و نسكر من مواويله
و يكمل حلمنا بينا ... فيحكينا
لناس هتحب بعدينا
#فهمى_على
دار نشر القلم للطباعة والنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة