(بحبك يا بلدى)
***********
بحبك يا بلدى وعاشق هواكى
وعقلى وروحى وعمرى فداكى
بحبك وقلبى عشانك حزين
شايف اللى فيكى عايشين مقهورين
وشايف ولادك ف البلاد سواحين
وشايفك صبية محرومة من صباكى
*****************
بحبك يا بلدى واتمنى تكونى ليا
وحبك يا بلدى ماهانش يوم عليا
ولكنى شايفك صاينة اللى خانك
واخداه فى حضنك وهاينة اللى صانك
وراوى ترابك بدمو عشانك
ويحلم يشوفك عزيزة وابية
******************
انا بحلم يابلدى تضمى الغلابة
تاخديهم ف حضنك دول عاشقين صبابة
دول هما اللى بيهم دارت مصانع
وهما اللى زرعو الخير ف المزارع
وهما اللى رصو صفوف الجوامع
وهما اللى برضو واكلاهم الديابة
******************
بحبك يا بلدى وهقول بعلو صوتى
وهخلى اللى كارهك يتمنى سكوتى
هحكيلك يا بلدى ع الغدر وعالخيانة
وع اللى باع ترابك وجابلك الاهانة
وع اللى باع المية وساب ارضى عطشانة
هقول واحكى يا بلدى لو كان التمن موتى
*****************
مجدى ابو زيادة.
دار نشر القلم للطباعة والنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة