حكايه عاقل جواه مجنون = ياسر الدميني

انا انسان عادي لا انا يابانى أو تيواني
كل الموضوع اني انسان بيعاني
في لمه كبيره لكنه وحيد
أهله كتير لكنه يتيم
انسان في طبعه عنيد
بيحب حاجات مجنونه
أفعاله كتير مش موزونه
وده لأنه سبق قلبه تفكيره
ولو يعشق بيصبح واحد غيره
بيحب النسكافيه الصبح وبينام من القهوه
بيكره الدخان ومصاحب النسيان
بيحب الورد والخضره والشتا والمطر
و كرسي العربيه القدامى
ثقته في قلمه وكتابه
بواقي شاعر بيتكلم
يادوب يوصف ويتألم
كتير يخونوه ولا عمره يتعلم
قلبه غرف سكناه حاجات ماتت
الحب والإخلاص وكتير من الاحساس
تفتكره ده محتاج دكتور نفسانى
طيب لو كان بيعانى
كل اللى يعيشه انانى
الكون ماليان أفراح بتتوزع والحزن محجوز علشاني
هل ده محتاج دكتور نفساني
بيصاحب ناس كتير جدا
ويعيش وحده
بيكلم عشرين في اليوم مش محتاجهم
واللي محتاجهم مش عاوزينه
عاوزينه فاكرهم دايما
لكن هما في الغالب ناسيينه
سنده في الدنيا دراعه
وصحابه ورق بمواقف مكتوبه
وأهله خيال
محروم حتى أنه يكون له عيال
انسان فاضى مكتوب عليه يعيش ع الفاضي
بيملأ حياته حاجات مش مفهومه
كلمات صعبه ومش موزونه
أفكاره صبحت مجنونه
لولا الكفر كان يبقى انتحاره سبيل
عايش حياته عليل
في صحه تمام
مجنون عامل عاقل
وساعات موزون في مواقف مافيهاش تفاصيل
مالوش من الصحبه خليل
الكل عايش في مسلسل
والدور لوحده بيتسلسل
وصفاؤه محبوس في إزازه في قاع بحر مش موجود
عايش في وسط ناس لكنه مش معدود
خيال واسع مالهش حدود
وطريقه ماليان بسدود
تفتكره ده عادى
 ولا محتاج دكتور نفسانى